دعوه للتوريث . . بجد مش تهييس
اول حاجه قبل ما اتكلم , شوفتوا العنوان بالذمه ؟ تحفه و الله يا جماعه انا فنان , شوفتوا الوزن و القافيه و الإيقاع , شوفتوا اكتر من كده إبداع , ياريت يا جماعه حد يوصل كلامى للمطرب المُلهم شعبولا ويتحقق حلمى و تبقى دى مطلع اغنيته الجديده , دى دعوه للتوريث . . بجد مش تهييس و ايـــــــــــه
ايه؟ مالكم؟ بتبصولى كده ليه؟ ايوه انا قصدى على التوريث إياه , وهو فيه غيره؟؟
ده جيمى ده يأمر , ده انا الفهاله و اديهاله و فوقيها مشطين كبريت كمان عشان يولع فى اى حد مش عجبه
إهدوا كده و بلاش تشنجات و صلوا على النبى , شوفتم انا قلت "صلوا على النبى" إزاى عشان محدش يقوللى تعصب و كلام فارغ , مش مصر يا جماعه إللى يبقى فيها تعصب التعصب ده فى البلاد المتخلفه إللى زى فرنسا و إنجلترا و إيطاليا مش أم الدنيا
ها؟ خلاص؟ كله هدى كده و استغفر ربه؟ , نخش فى المفيد , تعالوا نحسبها حسبه صغيره
لنفترض جدلاً مثلاً مثلاُ يعنى , انا بقول مثلاً يعنى إن الرئيس ربنا يطوللنا فى عمره مات , وطبعاً ده مش حيحصل الريس حيفضل حسه فى الدنيا , هو إحنا عايشين إلا بباركته و بعدين إللى خلف مامتش و بعدين الريس ممكن يعملها فعلياً و ما يموتش , مافيش حاجه مستحيله على صاحب الضربه الجويه إللى فتحت باب الحريه , وممكن ياخد إستثنا عشان إنجازته فى مصر و يبقى اول إنسان عملها و ماخلعش و يخش التاريخ اكتر ماهو خاشش و نخش معاه
نرجع مرجوعنا بقى للإفتراض الوهمى إللى هو "الشر بره و بعيد يعنى كده " حد يقدر يقولى الخريطه شكلها هيبقى عامل ازاى؟؟؟؟؟؟؟؟
انا اقولكم . .
حزب وطنى = جمال مبارك , اظن دى مافيش عليها خلاف ,
مش عايز حزب وطنى؟ ليه يا عم كده ده لمصلحتك؟ المهم حمشى معاك للآخر يتفضل مين؟
غد؟؟ ربنا يفك سجنه
وفد؟؟ ربنا يبشبش الطوبه إللى تحت راسه
احزاب ليبراليه بقى و العربى الناصرى و مصر الفتاه و مصر إللى مأرى فتحتها و الليله دى؟ ربنا ينتعهم بالسلامه
مافضلش غير ميـــــــــن؟؟
عليك نور شله "وأعدوا" الإخوان المسلمين ! يعنى الإسلام هو الحل , يعنى السيف , يعنى المسدس , يعنى ملوك الطظ و سمعنى احلى صوت إنتخابى
دول بقى على جثتى؟ مش بالمعنى المجازى لأ , على جثتى فعلاً و على جثث كتيـــــــــر
حتقولى ليه بس يا عم ؟ حقولك ليه بس لتانى مره حطلب منك تهدى خلاص و تربط الحزام و تمسك فى الكرسى اللى قاعد عليه و تكمل كوبايه اللمون
بص يا سيدى , انا مسيحى , يعنى حتقولى الإسلام هو الحل ! حقوللك إسلام يعنى ايه؟
حتقولى الشريعه الإسلاميه ! حقوللك على نفسك
حتقوللى الحكم بما انزل الله حقوللك احنا مختلفين اساساً فيما انزله الله
يعنى من الآخر دين فى سياسه و سياسه فى دين , ده شغل معتوهين
و بعدين إحنا طالع بوزنا مع الوطنى "لمصلحتك" عشان نبنى مكان نصلى فيه و لا عشان نسمع كلمتين لينا فى الإعلام و الأجهزه المرميه دى و لا عشان نخفض نسبه دبح القبط و لا ولا ولا , كل ده مع وطنى و كمان لمصلحتك
امال حنعمل ايه مع إللى داخلين فينا بدراعهم و بصدرهم و بسيوفهم و بالجلاليب إللى نسيوا يكملوها دى
حتبقى دم ! بس طبعاً دمنا إحنا اللى حيسيح , احنا ملناش فى العنف بس برضه دماغنا ناشفه ما احنه صعايده , يعنى حيقوللنا شريعه وحدود ! حنقول لأ لا حدود و لا إنبى , وإللى يحصل يحصل بقى بعيديها
ها؟ شفت الدنيا ماشيه الزاى؟ ماشيه لامؤاخذه بالحته إللى الورا؟ طب و على ايه ده كله ! ما اللى تعرفوا …. ولا ايه
اهو على الاقل جيمى ابن ناس برضه و يفهم فى الاصول و مش حيخلصوا نتبهدل " اوى" يعنى , يعنى حنحافظ على معدلات البهدله
إذا فـــــــ
جيــــمى هو الحــــــــــل
سلام
