اعلان وزاره الداخليه .. فقط وحصرياً .. على مدونه كلمات
وزاره النقل والمواصلات بتصرف ملايين من فلوس حضرتك عشان تقنع حضرتك انك تركب فى قطر حضرتك
وعشان تقنع حضرتك انك لما تشوف حضرتك بتعمل تصرف غلط فى قطر حضرتك .. تقول لحضرتك كده عيب ومايصحش .. حضرتك
ووزاره الماليه بتصرف برضه ملايين من فلوس حضرتك عشان تفكر حضرتك انك لو مادفعتش فلوس حضرتك بالتى هى احسن هتروح فى داهيه حضرتك
ووزاره الصحه كمان بتصرف ملايين حضرتك عشان شعبولا يقول لحضرتك ماتربيش طيور فى عشش حضرتك .. عشان ماحدش قالها ان حضرتك بطلت تصدق كلام الوزاره واعلانتها من زمان
اما بقى برج القاهره بتاع حضرتك فصرف ملايين حضرتك عشان يفكر حضرتك انه جاب فرعين نور من فلوس حضرتك ونور بيهم البرج
يعنى الخلاصه حضرتك .. ان كل الوزارات بتلسع حضرتك على قفاك .. يبقى ليه بقى حضرتك مركز بس مع وزاره الداخليه؟
مع ان لسع القفا فى الداخليه من ضروريات العمل .. مش رفاهيه زى باقى الوزارات
الحمله القوميه لتظبيط سلوك المواطنين
وزاره الداخليه
ابتسم للباشا وسلم له قفاك .. احسن ما بالعصايه ****ك
( ده سيناريو حمله الدعايه لوزاره الداخليه اهديه الى ملك رمضان المتوج طارق نور)
